رد تامر حسني على رسالة المخرج محمد سامي، بطريقة مؤثرة مؤكدا أنه قرر تبني موهبته لأنه تعامل معه من أول لحظة بقلب الأب وليس الصديق.
“نص خبر” – عمرو يوسف
تامر أبدى تأثره الشديد برسالة المخرج محمد سامي عن بداياته وكيف دعمه تامر وتبناه وآمن بموهبته، ورد المطرب المصري قائلا: يا سامي يا حبيبي يا ابن الناس الطيبين شكرًا من كل قلبي على كل حرف خارج من قلبك كتبته في حقي ، خلتني أدمع يا سمسم، أولًا أنا صدقت موهبتك من و انت صغير سنًا لإنك فعلًا موهوب موهبة مش عادية وتاريخ نجاحاتك يشهد بكده ، كنت عارف وانا بقدمك إني بقدم مكسب حقيقي للصناعة و من يوم ما سجلت رقمك على تليفوني و هو مكتوب سامي إبني، عشان كان إصراري على تقديمك كان بقلب أب مش صديق من سنك أب مصدق في ابنه وعارف إن الناس مش هيدوله فرصه يطلع عشان سنه صغير.
وأضاف تامر حسني: الحمدلله برحلتك و رحلتي اثبتنا للدنيا إنها مش بالسن لأ !.. بالمجهود و التعب و الشطاره و المذاكره و انت كل الصفات دي كانت فيك وانا لوحدي اللي عارف ، عشان كده صممت إن الدنيا كلها تعرف معايا حجم موهبتك الحقيقي ، حتى أعمالي اللي من إخراجك ليها مكانه خاصه في قلوب الناس، ولسه إن شاء الله نجاحات جايه مستنيانا مع بعض ، ربنا يوفقك يا حبيبي في كل شغلك اللي جاي وتكسر الدنيا و في القمه زي عادتك ،، يا محمد شكراً تاني على البوست الصادق ده شكرًا يا أصيل يا محترم، ربنا يخلينا دايمًا لبعض ضهر و سند.
رسالة محمد سامي إلى تامر حسني
يذكر أن المخرج محمد سامي نسب الفضل فيما وصل إليه من مكانة فنية إلى مكتشف موهبته النجم تامر حسني، مطالبا النجوم الكبار بمنح الفرص للموهوبين.
وتحت عنوان “وَلَا تَنْسَوُا الْفَضْلَ بَيْنَكُمْ” نشر محمد سامي صورة نادرة له برفقة تامر حسني من كواليس أول تعاون بينهما في مسلسل آدم، وعلق عليها عبر حسابه على انستغرام قائلا: وأنا قاعد إمبارح في التصوير افتكرت الرحلة و الشقي و التعب من أول عمل لحد العمل اللي بصوره دلوقتي و افتكرت صعوبة الحصول علي فرصة عشان الواحد يثبت نفسة و يحقق أحلامه، فطبعا افتكرت أخويا و صاحبي الجدع الطيب الخلوق اللي دعمني من أول لحظة و كان سبب في اللي أنا فيه دلوقتي.
عرض هذا المنشور على Instagram
أضاف محمد سامي: تامر قدم لي كل الدعم و الحب و الامكانيات اللي خلتني اثبت نفسي وبالذات في وقت كان صعب الشباب ياخد في الدراما فرصة بحجم مسلسل آدم.
وواصل قائلا: فاكر اني الكل كان رافض اني اخد الفرصة دي ومستكبرينها عليا الا هو وقف في ظهري كأنه بيحارب لأخوه و بصلي مرة والظروف كلها ضدي و كنت حاسس وانا بحضر انهم هيجيبو حد غيري و قاللي ده مسلسلك و هتعمله و هتنجح و هتنجحنا معاك، حتي طريقته المتواضعة و هو بيقوللي مسلسلك كأني عامل تسع مسلسلات قبله تحسس الواحد بنفسه و أهميته.
ووجه محمد سامي رسالة مباشرة إلى تامر حسني قال فيها:أشهد أمام الله إنك طول عمرك متواضع و مؤدب وتطلب الحاجة باحترام، ومع الكرو محترم وعشان كدة كلنا روحنا فيك، بحبك يا صاحبي و تستاهل كل حاجة حلوة يا أجمل قلب، ويا رب يرزق كل الناس باللي يساعدهم علي تحقيق أحلامهم زي ما رزقني بتامر حسني.