حسن يوسف: شمس البارودى رفضت التمثيل مع عادل إمام
5 يونيو 2023
القاهرة – عمرو يوسف
كشف الفنان حسن يوسف، كواليس مشاركة زوجته الفنانة المعتزلة شمس البارودي ببطولة فيلم “اتنين على الطريق”، مؤكدا أنها رفضت مشاركة عادل إمام بطولة الفيلم، ولكنه تدخل لاقناعها بالموافقة لأن موقفه ك “مخرج للعمل” كان سيتعرض لأزمة كبيرة في الوسط الفني، لافتا إلى أن العمل تم بيعه قبل تصويره باسم عادل ولم يكن واردا تغييره.
أضاف حسن يوسف خلال ندوة تكريمه في “قصر السينما” أن شمس البارودي كانت تريد أن تقدم البطولة أمامه هو وليس أمام عادل إمام، وقال: الفيلم دا أنا كنت المخرج بتاعه، وشمس البطلة قدام عادل إمام، والفيلم اتباع باسم عادل إمام، وهي كانت رافضة في الأول تمثل قدام عادل إمام، بس أنا قولتلها متعتذرش عشان أنا كـ مخرج وضعي هايهتز، وقولتلها تكمل في الفيلم، وبالرغم إنه كان فيله حلو ومتصور في اليونان، بس للأسف منجحش أوي.
وحسم يوسف صحة الأخبار المتواترة عن عودة شمس البارودي من الاعتزال، وقال: شمس نسيت إنها ممثلة، لأنها بعيدة عن التمثيل من سنة 1981، وهي بتحب البيت أوي وبتحب المطبخ جدًا، ومعنديش تفسير للشائعات اللي بتطلع كل شوية عن عودتها للفن.
سعاد حسني “قتلت” ولم تنتحر
وتحدث حسن يوسف عن قضية وفاة سعاد حسني، حيث رجح أن الفنانة الراحلة قتلت ولم تنتحر مثلما زعم البعض، مشيرا إلى أن القتلة ربما يكونوا أعطوها حقنة لتوقف قلبها، قبل أن يلقوا الجثة من المسكن التي كانت تقيم به، حسب قوله.
وقال حسن يوسف: أعتقد إن سعاد حسني اتقتلت مش انتحرت، والمنتحر المفروض يكون جمبه دم، هي اتقتلت في الشقة قبل ما تترمي أدوها حقنة توقف قلبها مثلا.
أضاف حسن يوسف: روحنا لندن نزور ابننا محمود ومن أهداف الرحلة إن شمس، تقنعها بالرجوع وكانت بدأت تخس وينزل وزنها، وكان عندها العصب السابع، وبعدين سمعنا إنها اترمت، كانت بتستعد إنها تيجي وترجع.. الله يرحمها زعلت عليها أوي وكنت بعتبرها زميلة تختة الله يرحمها كانت موهبة كبيرة أوي.
وتابع حسن يوسف: سعاد حسني كان دمها زي الشربات، كانت عبقرية بشهادة فاتن حمامة اللي قالت: السينما قدامها كتير عشان تجيب زي سعاد حسني في براعتها وحضورها.
وأضاف حسن يوسف: لحظات السعادة كانت قدام الكاميرا، ولكن كانت في حياتها تعيسة وكل زيجاتها كانت فاشلة وأنا كنت زي أخوها، وتكلمني الساعة 2 بليل تقولي إلحقني صلاح كريم هيموتني.. وأنا أنزلها وأقولها خليكي زيي شوفي نادية لطفي بتعمل ايه بتحسبها بالمللي.. الله يرحمها كانت ممثلة متتعوضش رغم إن فيه بنات كتير طلعوا بعدها.