أعلنت الإعلامية سالي عبد السلام عن وفاة جنينيها التوأم قبل ولادتهما، بعد انتظار عامين كاملين لتحقيق حلم الأمومة.
“نص خبر” – عمرو يوسف
وقالت في رسالة مؤثرة على صفحتها الشخصية بالفيس بوك: “قدر الله وما شاء فعل، من كام يوم، وده بعد سنتين انتظار التوأم اللي كان نفسي فيهم أوى يا رب، سنتين صبر وأنت مفيش قدامك غير الصبر زي أي رزق.
وأضافت: والحمد لله إن اختباري كان في الصبر وبس مش أكتر وكنت طالباها تيجي من عند ربنا خالص ومن غير تدخل دكاترة”.
وواصلت: الحمد لله على نعمة الأخذ بعد العطاء، يا رب فقدت أغلى ما ليَّ، واللي كان هيكون ليَّ، الحمد لله، قدري الحمد لله، أنا بكتب الكلام ده عشان يمكن حد يتعلم!!
وتابعت تعليقا على عدة صور لها من داخل المستشفى: كل حد قال لى وقال عليَّ مش عايزة تخلف عشان خايفة على جسمها وشغلها.. وكانت أوحش حاجة سمعتها في حياتي (وهم لا يعلمون شيئًا)”.
وواصلت سالي عبد السلام: عشان كل حد بيضغط على اللي قدامه وفاكر إنه حقه وده لا يحق له عشان المفروض إنه قريب أو معتبر نفسه كده ومش من أهله أصلًا ولا يحق له.
وقالت: ويحسسهم إن وراهم تارجت يا إما هيكون منبوذ منهم وهنسود عيشتك بسؤالنا كل شهر ونضغط عليك مع إنهم مش هيشيلوا أصلًا وما حدش هيشيل غيرك.. (وهم لا يعلمون شيئًا).
وواصلت سالي عبد السلام: “اوعَى تقولي إنك حامل وخافي من العين وأي كلام في الموضوع ده بالذات!!! أهه ما قُلتش وبرضه ما حصلش ومع احترامي ليهم العرسة بتخلف ده مش إنجاز… (وهم لا يعلمون شيئًا).
واستطردت: “عشان كل ست اوعي تبقى بـ ١٠٠ ست وتشيلي مسؤولية كل حاجة لوحدك “لوحدك”.. الست الجدعة بجد ما بتاخدش حاجة.
وأضافت: الست الجدعة ما حدش بيساعدها وكله بيرمي عليها وكمان لما ما نعرفش نبقى زيها نعطلها أو نقلل منها وبمعنى أصح نبقى سبب في سقوط كل حاجة فيها مش أطفالها بس! يا ريتني قُلت ما بعرفش أو مش هقدر عشان ما أوصلش لكدة! (وهم لا يعلمون شيئًا)
وأضافت: “كلنا تعبنا وبنتعب ومحدش بيحس ومحدش طلب منك تحس بس الرحمة… الرحمة.. كل اللي كتبت عنهم بيني وبينكم الله”.
واختتمت سالي عبد السلام البوست قائلة: “إنا لله وإنا إليه راجعون.. ادعوا لي كتير.. راضية والحمد لله.. بس بنهار وأنا بصلي ومش بطلب غير الثبات من ربنا.. بس ليَّ بيتين في الجنة.. اخترت الآخرة والأبقى يا الله”.
مشاركة سابقة
المشاركة التالية