نرمين الفقي: لم أغلق باب قلبي أمام الحب

17 يونيو 2023

القاهرة – عمرو يوسف

كشفت الفنانة نرمين الفقي مواصفات شريك أحلامها، مؤكدة أنها لم تقفل باب الزواج، مشيرة إلى أنها لم تجد الشخص المناسب وقالت: عمري ما قفلت قلبي وكل واحدة فينا عندها الأمومة والأنوثة، ولكن لما يجي ابن الحلال اللي يقدر يخيلها تقدم على الزواج؛ لإن الواحدة لما تشتغل وتنجح بتكون عاوزة راجل قوي وجامد تتسند عليه علشان تخلع رداء الرجولة ولا تبقى سوى امراة.

وعن مواصفات شريك أحلامها قالت نرمين الفقي خلال لقاء لها عبر شاشة تلفزيون قناة رؤيا مصر: يكون متعلم ومثقف وابن اصول وأهله مربينه صح ومتدين مش مجرد كلمة علشان يقدر يحافظ عليا ومش متدلع ولا سليط اللسان.

وواصلت نرمين الفقي: بيجي لي عرسان ولكني مش كل يوم بنزل وبخرج ومش بدي نفسي الفرصة إني أقابل أشخاص، وفي الآخر ده رزق هيجي هيجي بإذن الله.

واضافت نرمين الفقي، إنها لا تتفق مع مقولة الرجل يطفي الست، قائلة: الراجل الصح مع الست الصح بيحليها وبيصغرها وبيخلي نفسيتها مرتاحة، لإن من الصعب الست تعيش ست وراجل في نفس الوقت، وأنا للأسف بعيش ست وراجل بعمل كل حاجة وبدخل في كل حاجة ودي حاجة مرهقة جدًا.

وقدمت نرمين الفقي روشتة للسيدات حتى يحافظن على جمالهن قائلة: يكون قلبهم حلو ويلعبوا رياضة ومش لازم جيم أنا أحيانًا بلعب رياضة في بيتي، والست لازم يكون فيها أكتر من حاجة مش مجرد جمال فقط، يعني تخلي بالها من جسمها ومن نفسها وتكون ست بيت وفي شغلها تبقى ست بجد شاطرة وتحافظ على نفسها قدر المستطاع وفي ناس كتير ناجحين وكويسين أوي.

وأكدت نرمين الفقي في لقاء تليفزيوني، أنه لا يوجد ست حلوة وأخرى سيئة، موضحة: مفيش حاجة اسمها ست حلوة وست وحشة، ولكن في ست هي اللي بتخلي نفسها وحشة فلو تخينة المفروض تخسس نفسها، وفي حاجة اسمها ست لما تفتح بقها بتكون عاوز تقول لها اسكتي ما تفتحيش بقك، وست مش مثقفة ومش مطلعة وده اللي بيوحش الست.