المخرج عمرو سلامة يخشى الشعور بالندم بعد اكتشافه لمواهب الأطفال

14 يونيو 2023

القاهرة – عمرو يوسف

كشف المخرج المصري عمرو سلامة، عن شعوره بالقلق على مصير أبطاله من المواهب الصغيرة، لافتا إلى خوفه على “تدمير” حياة هؤلاء الأطفال بسببه تشجيعه لهم على خوض تجربة التمثيل، وقال إنه عندما اكتشف أحمد داش لم يتوقع أن يستمر مشواره الفني طويلا.

أضاف عمرو سلامة: بختار الأطفال الممثلين بإني أشوف أطفال كتير عشان أعرف أختار الأحسن، ويكون قدامي اختيارات متننوعة، وفي فيلم لامؤاخذة التصفيات وصلتني لـ أحمد داش ومعاه طفل تاني، وحطيتهم في اختبارات كتير لحد ما استقريت على داش، وعادة بتعامل مع الأطفال في التصوير على إنهم شخصيات ناضجة ومش بطبطب عليهم، وشايف إن الوسيلة دي بتنفع جدا في الشغل.

وتابع: مكنتش متوقع إن أحمد داش هيكمل مسيرة التمثيل، لأننا شوفنا أطفال كتير بتبدأ وهي صغيرة وبتكون كويسة جدا بس مش بتكمل لما بتكبر شوية، فالموضوع بيعتمد على المجهود الشخصي لكل ممثل فيهم، واللي حصل إن عمر شريف وأحمد داش كان عندهم الرغبة إنهم يكملوا مسيرة التمثيل، وموقفوش عند نجاح لامؤاخذة وبرة المنهج.

وواصل قائلا: دايما ببقى قلقان تجاه الأطفال اللي بقدمها للتمثيل، وببقى حاسس إني عملت فيهم مصيبة، لأني إديتهم فرصة يظهروا كممثلين وفي أدوار بطولة، ببقى خايف إن حياة الطفل ده بعد 10 سنين تتدمر بسببي وأحس ساعتها بتأنيب ضمير.

واختتم حديثه قائلا: عشان كدة بحب أتناقش مع أهل كل طفل، وأقولهم يتأكدوا من قرار موافقتهم، وبطلب منهم يركزوا هيتعاملوا مع الطفل المميز ده إزاي، اللي مش هيعيش حياة طبيعية، وهيتسمى في فصله الفنان، وكل الناس فجأة هتبقى عايزة تتصور معاه.