نص خبر ـ متابعة
نعت الفنانة فريدة سيف النصر شقيقها بدر الدين الذي رحل الأحد، في بث مباشر عبر حسابها الشخصي على “فيسبوك”، حيث ظهرت فيه بصوتها فقط من دون أن تُظهر وجهها، معبّرة عن حزنها الشديد على فراقه، كما أكدت إيمانها بقضاء الله وقدره رغم ألم الفقد.
إعلان الوفاة
بدأت فريدة سيف النصر حديثها قائلةً بصوتٍ تغلب عليه الدموع: “البقاء لله يا حبيبي.. إنا لله وإنا إليه راجعون.. أخويا بدر الدين في ذمة الله.. الله جميل، الله حنون، الله رؤوف، الله خلصه من كل حاجة كانت وحشة في حياته.. بدر رايح زي الفل، المبطون بيخش الجنة، هو كل حاجة، ما سبتوش، بقيت فيه.. سلم هدومه للأرض خلاص، الثوب اللي كان لابسه سلمه بالي ومتقطع ومتبهدل.”
الأزمة الصحية لشقيقها
وأشارت فريدة إلى أن شقيقها كان يعاني من أزمة صحية مفاجئة قائلة: “هو دخل المستشفى، قلبه تعب، وشوية كيراتين على الكلى، لكن الحمد لله.. بعدين عرفنا أن عنده كبد وكلى ورئة وقولون ومريء، كل حاجة، الحمد لله على كل حال.”
تأثر فريدة وذكرياتها
تابعت فريدة سيف النصر حديثها وسط تأثر واضح قائلة: “يا حبيبي بطل.. أنا محتسباه عند الله من رجال الجنة، ما كانش بيسيب فرض ولا صلاة، وكان دايمًا يدعي ربنا إنه يبلغه رمضان.. أنا مؤمنة بقضاء الله وقدره، الفراق صعب وقلبي وجعني عليه، لكن هو ارتاح.. بدر ارتاح من الناس”.
وأضافت منتقدة بعض تصرفات الأطباء والمستشفيات بقولها: “اللي عاوز يخلص من مريض بيوديه مستشفى، ما تزعلوش مني.. في دكاترة كويسين أوي، بس الله أعلم إيه اللي بيتعمل في الناس.. خلاص، الحمد لله، هو ارتاح، لكن اللي حواليه مش مرتاحين”.
تفاصيل الساعات الأخيرة لشقيق فريدة سيف النصر
كشفت الفنانة عن تفاصيل مؤلمة من الساعات الأخيرة في حياة شقيقها قائلة: “آخر مرة سجل لي دعاء بصوته وهو في الإنعاش، وقلت هي ما اسمهاش إنعاش، دي اسمها (إن عاش).. ده إذا عاش يعني، سبحان الله.. أخويا مات أربع مرات جوا الإنعاش، مرة نص ساعة، ومرة 25 دقيقة، ومرة 10 دقايق، وآخر مرة في الغسيل الأخير 5 دقايق، وكان يرجع تاني.. بس خلاص، المقاومة بتاعته خلصت.”
وأضافت بحرقة: “كنت بطل يا حبيبي، عشت بطل وموت بطل.. أنا بعزي نفسي، وبعزي صحابه وولاده ومراته الست المحترمة اللي ما سابتهوش لحظة، وبنته، وابني، وابن أخويا”.
نداء للرحمة بين الناس
اختتمت فريدة سيف النصر رسالتها بنداء مؤثر للرحمة بين الناس، قائلة: “كفاية دم وكفاية بهدلة في الحيوانات والبني آدمين، في الأطفال والكبار.. اللي ضرب الراجل بالقلم، واللي افترى، يا جماعة في ثواني كلنا في التراب”.
رسالة سابقة للجمهور
يُذكر أن الفنانة فريدة سيف النصر كانت قد وجهت قبل أيام رسالة لجمهورها عبر “فيسبوك”، ناشدتهم فيها بالدعاء لشقيقها بدر الدين، مؤكدة أن حالته الصحية في تدهور كبير. وكتبت حينها: “حبايبي في الله، من قلب موجوع على وجع قلب أخوه اللي سكنوا رحم واحد وطعامهم من دم ولحم ولبن واحد.. صعب يا قلبي تستغيث بيا وتقولي قلبي بيوجعني يا فريدة ادعي لي.. أنا كل نقطة دم ونفس فيا بيدعيلك، وهطلب من الطيبين يدعوا لبدر الدين أخويا حبيبي.. الدعاء يرفع البلاء ويغير القدر.”
وأضافت: “الحالة صعبة، بس مفيش صعب على ربنا.. والله قلبي موجوع ونغزات على كل آه منه، ودموعي في حلقي.. يااااا رب، لأول مرة يطلب حاجة ماعرفش أعملها، أنا عاجزة يا رب.”