هنا شيحة ترفض الدفاع عن شقيقتها حلا: أنا مش المحامية بتاعتها

3 أغسطس 2023

القاهرة – عمرو يوسف

رفضت الفنانة هنا شيحة، التعليق على مواقف شقيقتها حلا سواء باعتزال الفن أو التراجع عن قرارها، كما امتنعت تماما عن التعليق على الانتقادات الموجهة إلى شقيقتها، مؤكدة أن العلاقة الخاصة بينهن ستبقى “خارج الوسط الفني”، وقالت: أنا مش المحامية بتاعتها وكل واحد مسئول عن نفسه.

وقالت هنا شيحة في تصريحات تلفزيونية: إحنا إخوات برا الوسط الفني، لكن أنا كفنانة مليش علاقة بيها كفنانة، وهي ليها اختياراتها وحياتها ومينفعش أتدخل في ده.. أو يبقى ليا رأي سواء كان مع أو ضد.

وتابعت هنا شيحة: أنا مبتدخلش في حاجة متخصنيش.. بشوف إن كل بني آدم مسئول عن نفسه، في ناس بتقولي إنتي أختها.. بس أنا مش المحامية بتاعتها ولا المتحدثة الرسمية، فياريت محدش ياخد رأيي ولا يسألني عن المواضيع الخاصة دي.

وأضافت هنا شيحة: أنا مبدخلش في الحياة الشخصية لأي شخص وكل شخص ليه الحرية  في حياته الشخصية، وإحنا مش شغلتنا نتحكم في بعض ولا نحكم على بعض ولا نجلد بعض، علاقة الشخص الدينية دي بينه وبين ربنا، أنا مالي مبتدخلش في حياة حد، ولا مرة طلعت اتكلمت في موضوع أختي ولا موضوع أي فنانة المواضيع الخاصة دي أنا مبتكلمش فيها.

وردت هنا شيحة على شائعات ارتباطها، حيث ردت بأنها ليست في علاقة ارتباط حاليًا وهي سنجل ماما، معلقة: الموضوع مش سهل بالنسبة ليا ومفيش علاقة حب براجل لكن في علاقة حب لنفسي، وبدأت أبني علاقة إيجابية مع نفسي، لأني كنت حزينة من نفسي في فترة ودائما أبحث عن السعادة، ومع الوقت والقراءة اكتشفت السعادة  طلعت من جوايا أنا.